المخرجة إيناس الدغيدي تكشف الأسرار وتتحدث عن أحمد عز وياسمين صبري وقُبلة يسرا

حلّت المخرجة إيناس الدغيدي ضيفةً على برنامج “أسرار” الذي تقدّمه الإعلامية أميرة بدر على قناة “النهار”، حيث كشفت العديد من أسرارها الشخصية والفنية، وتحدثت عن رفضها لأحمد عز وياسمين صبري ومنى زكي، وباحت للمرة الأولى بسرّ عن الفنانة يسرا.المخرجة إيناس الدغيدي تكشف الأسرار وتتحدث عن أحمد عز وياسمين صبري وقُبلة يسرا

وقالت إيناس في البرنامج:

– “أنا مش مغرورة لكن شكلي مغرور، وعمرو سعد مكسرش المكتب عندي، هو حد كلّمني قالي فيه ولد كويس أوي هيجيلك المكتب عشان عايز يمثل، وأنا مكنتش موجودة، ومكلّمنيش قبلها، وقال للسكرتيرة أنا مش همشي وقاعد استنى، فاكر إنها مخبياني عنه، وهو كتب لي جواب، بس عرفت الموضوع ده بعد ما بقى عمرو سعد”.

– “اخترت أحمد عز من كاست وكان موديل إعلانات، رفضته في الأول، عشان مكنش مناسب سنّاً، عشان كان أصغر من يسرا ومش هينفع، الفيلم كان فيه بوسة، ويسرا جات قالتلي مين الراجل اللي هيبوسني، قلتلها جايبالك واحد كويس، عشان مش عايزة تتباس من أي حد، لما شافته قالتلي هو ده اللي اخترتيه؟ طب أنتي بصّيتي على سنانه؟ مش هينفع أبوسه عشان سنانه كلها سودة”.

المخرجة إيناس الدغيدي تكشف الأسرار وتتحدث عن أحمد عز وياسمين صبري وقُبلة يسرا

المنتج كان مقتنع بأحمد عز عشان وسامته، وراح قال ليسرا فيه واحد كويس أوي بس إيناس شايفة أنه صغير، لما شافته قالتلي ده أنا هبوسه لكن اللي إنتي مختاراه مش هينفع، قلتلها ده صغير، قالتلي ماليش دعوة”.

– “أحمد عز بعد الموقف ده راح اتعلّم وجالي قالي عايز أعمل فيلم، عملت به “مذكرات مراهقة”، وعز تطور جداً، ومجتهد ومركز وعنده هدف”.

– “الناس عايزة أي كلام تتكلم فيه، النقاد مبيشوفوش أفلامي جريئة، وأنا طلعت في الزمن الصعب، وأفلامي وفترة نضجي كانت في الزمن اللي ابتدت مصر تتقفل فيه”.

– “لما الإخوان مسكوا، أول حاجة فكّرت فيها إني ألاقي مكان آخر ليا، وكنت هروح دبي، واتحطيت على قوائم الاغتيال من جماعة اسمها “الوعد” منبثقة من جماعة الإخوان”.

– “مرة حطّولي في الكراج صورة السادات وعليها سلاح وكاتبين عليها المصير، يعني مصيري هيبقى كده، وسألت بتوع الكراج مين اللي حطّها؟ قالولي منعرفش، وجوزي قاللي بلّغي البوليس، قلت له يمكن واحد أهبل مش عاجبه أفلامي”.

– “كنت خايفة يعملوا حاجة في بنتي، ودخّلتها جامعة بره مصر عشان الإخوان، وطول الوقت بيبعتولي، عشان ضد الحجاب، أيام الانتخابات، قلت نحاول ندّيهم فرصة”.

– “بقالي 14 سنة مشتغلتش واسمي موجود، وفيه مخرجين موجودين والناس متعرفهمش، والمخرجين أنواع، فيه اللي بينفّذ وفي اللي عنده فكر، أنا من اللي عندهم فكر”.

المخرجة إيناس الدغيدي تكشف الأسرار وتتحدث عن أحمد عز وياسمين صبري وقُبلة يسرا

أنا طول عمري عندي قضية بدافع عنها، مش دفاعاً عن المرأة بس، لكن علاقة الرجل بالمرأة، كل أفلامي كده”.

– “أنا أول مخرجة يجيبني منتج يدّيني فلوس عشان أعمل فيلم، ويثق فيا إني أعمل فيلم بمحمود حميدة ونجلاء فتحي في عزّهم”.

– “عادل إمام خلّى الناس تحبه وبعدين يشوفوا تطوراته”.

– “اشتغلت 45 فيلماً مساعِدة مع أكبر مخرجين، وكانت الصحافة تكتب عني وأنا مُساعِدة”.

– “لما بطلع في أي برنامج دايماً أفكاري مش عاجبة الناس، ومبعرفش أقول اللي مش جوايا”.

– “دايماً أقول إن الجمال باب يخلّيكي تاخدي مميزات أكتر من غيرك، لكن بقول إن الست الذكية اللي متعتمدش على جمالها بس، والحتة دي خلّتني جادة جداً”.

المخرجة إيناس الدغيدي تكشف الأسرار وتتحدث عن أحمد عز وياسمين صبري وقُبلة يسرا

كل الفنانات دخلوا الوسط عشان الجمال، وياسمين صبري دخلت عشان جميلة، بس عايزة تتطور، أنا بحبها بس عاوزة مخرجين ومساعدين يساعدوها”.

– “منى زكي راحت خدت كورسات وهي ممثلة كبيرة، وهاني خليفة مخرج شاطر، ومن أنصار شريف عرفة لأنه كان المساعد بتاعي”.

– “اتجوزت اللي حبّيته وقصة حب تسع سنين وتحدّيت كل حاجة حتى الدين وكان مسيحي وأسلم عشاني، ودخلت السينما، وكانوا رافضين عشان الديانة”.

– “والدي كان أستاذ تربية دينية ولغة عربية، مقابلش جوزي لأنه مات بعد زواجي بسنة، وقال مش هقابله عشان أغيّر دينه ومدخلش بيتنا غير في جنازة أبويا، ومعملتش فرح، عملته في بيتي، وكان عندي بيتي قبل ما اتجوز ومستقلة”.

– “أنا واحدة ربنا خلقها عكس الناس، ومش قاصدة لكن أنا من طفولتي كده، إحنا ثماني إخوات أنا عكسهم دايماً وعلاقتي بيهم حلوة ووالدي توفّى وهو راضي عني”.

– “لما بقيت مخرجة والدي قال أنا اللي شجّعتها، ووعدته إن التمثيل لا”.

– “أنا دخلت الفن بالصدفة، ولا كنت أعرف يعني إيه فن”.

– “حبّيت زوجي لحد النهاردة، وعلاقتنا مش بس زواج هي حياة وكان دايماً ورايا أكون مخرجة، وانفصلنا قبل وفاته، ابتدى يغير مني لما كبرنا، وسيبنا بعض بشياكة”.

– “حصل تزمت فكري في مصر وده سبب ابتعادي 14 سنة، لأنهم مش عايزين واحدة زي إيناس الدغيدي تتكلم”.

– “عندي مشاريع زي “الصمت” و”عصر الحريم” ومن ثماني سنوات، بيتكلم عن الجواري في مصر، وموضوعه يجنّن وقد إيه المرأة المصرية من 1800 بتدافع عن حقوقها”.

– “إزاي أشتغل مسلسل أستلم منه حلقتين وباقي الـ30 حلقة استلمهم على الهوا، طيب أخرج إزاي؟”.

– “مش هستنى لما نجم يقول عايز إيناس الدغيدي تيجي تخرجلي، عمري ما عملت كده مع أكبر النجوم، لأن الفنان لازم يبقى عنده كرامة، وأنا عندي مواضيع وهما عايزين حاجات لايت أنا مبشتغلهاش، واللي عايزني يكلّمني”.